| |
| |
El
Matàr de la Grola
Ciàpeli, scòndeli, tégneli
rento.
I’è mati: che i staga lighé a le letiere !
Orbeli, sòrdeli, séreghe el beco
che i sarea boni de dir robe vere.
I oci dei mati i rugola fora
nei coridoi del matàr de la Grola.
I mati i le liga
e quando i le mola
i scrive poesie sul matàr de la Grola.
Stùdieli, òlteli, daghe ‘na gossa
conta medissine come i grani d’en rosario.
Vesteli, ligheli, daghe la scossa
càmbieghe i nissoi e meteghe un sudario.
Le vosse dei mati le manda en malora
Tuti i dotori al matàr de la Grola.
I mati i le liga
e quando i le mola
i canta cansone al matàr de la Grola.
Sensa Posto
Fame un po’ de posto
parché ghe n’ho bisogno
anca mi.
Ehi,
fame un po’ de posto
parché i cantoni streti
j’è streti assé par tuti
j’è streti anca par mi.
‘Scolta,
fame un po’ de posto
parché un cincinìn de sol
el ghe piasarea un po’ a tuti
i se le merita un po’ tuti
me lo merito anca mi.
|
Da
Le Fughe de le Matonele – Casa Editrice Damolgraf
– editoria@damolgraf.it
venerdì 5 febbraio 2010
|
|
